بالبلدي كده ومش بهرج - الجزء الاول

بالبلدي كده ومحدش يقولي لا فصحي ولا عامية انا لا عارف اكتب ولا لاقي كلام اكتبه . يا عم الله يخليك متشتمش ومتعمليش فيها ابو الكتاب والفلاسفه وهو يعني انت بتكلم اخواتك وولادك بالفصحي . مش حجة عارف بس عديها بقي

المهم ايه انا بصراحه شايف ان في تهريج بيحصل في البلد وقلت لازم يبقالي دور ، لا لا مش دور اني اعدل المايلة انا اقصد دور اني اهرج يعني ، ايه فيها ايه هو انا مليش نفس اهرج ولا عشان يعني سميت نفسي كاتب وكتبتلي كام مقاله يبقي خلاص بقي الناس كلها تهرج واعمل فيها انا عم المحترم
طيب اهرج في ايه وازاي بقي ؟ اهي دي بقي المشكلة لكل اللي زي حالاتي ، يقدر يبقي محترم بس لما تطلب معاه تهريج يحتار وميعرفش

مين بيهرج ؟ بالذمة ده سؤال ؟ طيب شوف معايا وقوللي بذمتك تهريج ولا مش تهريج
لما نجيبها من فوق بقي . شوف اساحبي ، دي صاحبي يعني متتخضش وتقولي ايه دي ما هي دي تهريج برضو بس تقليد يعني انا مخترعتهاش ، المهم يا معلم ان حاميها حراميها وحاكمها راميها واللي زي وزيك بقي يتريق عليها .

مجلس العسكر الله يخليه ويحميه لمصر بقاله سنة ونص بيهرج بس ايه بقي تهريج علي اصوله يعني لا تقدر تضحك عليه ولا تقدر حتي تفتح في عنيه .
نقول محاكمات ثورية يا عم العسكري الله يكرمك عايزين حق الشهدا ، يقولك لا يا ابني لازم تكون محاكمات مدنية عشان الفلوس اللي برا ، و بعد سنة ناخد البومبة الكبيرة لا حق شهدا جه ولا مليم من الخارج رجع ، طيب ده ايه يعني ؟ قول انت بقي

نقول يا ناس يا هو حرام كده الناس اللي ماتت حقها ضاع تلاقي بقي الفتك اللي ينط ويقولك الجيش والشعب ايد واحده ، يا عم هو احنا قلنا انهم من ذوات الاربع ، وبعدين يا خويا يا حبيبي هو يعني اللي يبقي لواء بيتعين عند ربنا ملاك مش بيغلط
المهم سيبكم من دي بقي ، من اسبوع مسك ريس جديد وطبعا الحمد لله انه مسك بدل ما كان مسكها شفيق باشا ابن العز والوصول ، طيب انا عمري ما شفت ريس يمسك النهارده تطلعله مظاهرات تاني يوم ، مين دول يا خوانا ؟ دول اللهو الخفي اللي طلع لعصام شرف ، اااااه متأجرين يعني ؟ لا لا ناس اصيله لها مطالب ، يا عم انا شايفهم بيتعلقو علي الباب الحديد ، طب وايه يعني اهو بيلعبو رياضه ويقو ضلاعاتهم

طبعا انا بقي مكدبتش خبر وقلت اقول في كل حتة ان دول متأجرين ، وعينكم ما تشوف الا النور ، لا انت مش بتفهم دي ناس بتنادي بالافراج عن 12 الف معتقل في احداث العباسية ومحمد محمود وغيرها ، اه صح طلعت مش بفهم ، الله طيب وبياع الفول اللي واقف ده كمان بيطالب بالافراج عن معتقلين ، طبعا لأ ده جاي عشان يبعتو فول للعيال اصلها مضربه عن الطعام ، طيب ما نروح التحرير كلنا ونعتصم ونتظاهر ، لا لا اصلنا فضينا الاعتصام ، فضيتو الاعتصام طيب واقفين هنا ليه ، مين قال اننا واقفين دول مش احنا ، والنعمة انا تهت خلاص

واحد صاحبي بقي واد عسل اوي شغال شتيمة في الاسلام والمسلمين علي فيس وتويتر وكله ، ايه يا بني انت مش مسلم ولا ايه ؟ اه مسلم بس مش عايز الاسلاميين يحكموا ، طيب يا بني ما تعارض باسلوب محترم ، محترم ايه يا عم ما الكل بيشتم ، اه صح عندك حق طيب انت وهما متخلفين ايه بقي مش كله بيشتم يعني حتيجي عليا ده انا حتي بشتم شتيمة محترمة .

المهم بقي واخر حاجه ، الناس الحلوة اللي زي الابراشي وغيره يسيبو الظواهر ويمسكو في الفرادي ، يعني ايه حقولك ، يعني المفروض الاعلام يناقش ظواهر مش يبقي صفحة الاحداث في الجرنال كل ما واحد يقتل قتيل يجيبو ويعملهالنا فرقيعه زي ما عمل كده مع العبيط اللي بيقولك زواج ملك اليمين ، الغريب ان اللي اعرفه ان الزواج ده كان ايام ما في جواري وهو في جواري في زمانا ده ؟

طبعا مش حفتح انا اصلي عارفكم بتزهقو بسرعه بس المرة الجايه اشوف حاجه جديده قصدي تهريج جديد واوجع راسكم بيه ، يلا سلام اساحبي

اقرا المقال في الجريدة